Galego
A situación de caída de prezos do leite que atravesan as explotacións lácteas nos últimos meses levou á Organización de Productores de Leche (OPL) a convocar unha manifestación e unha folga de entregas de leite. A manifestación será o 24 de marzo ante a sede central da Xunta, en Santiago de Compostela, en tanto a folga de entregas ten previsto o seu inicio ás 12 da noite do 29 ó 30 de marzo.
O prezo do leite en Galicia acumulaba en xaneiro unha caída duns 6 céntimos desde a primavera pasada e situábase xa na fronteira dos 30 céntimos, un límite vermello de referencia para o sector. Os novos contratos de compra-venda que están presentándolles as industrias ós gandeiros nos últimos días sitúanse de xeito xeneralizado por baixo dos 28 céntimos, segundo a OPL, o que supón producir por baixo dos custos de produción. “Teriamos que estar pagando para producir leite”, explican desde a Organización de Productores de Leche.
As industrias están presentando de xeito xeralizado contratos por baixo dos 28 céntimos, segundo a OPL
O actual marco normativo na compra-venda de leite trata de impulsar a negociación entre gandeiros e industrias, así como unha maior estabilidade, con contratos a un ano que eviten os conflictos a curto prazo. A realidade –asegura a OPL- é que as industrias continúan co seu ‘modus operandi’ habitual de imposición unilateral de prezos: “A industria está tratando de impoñer contratos sen precedentes coa amenaza de non retirar o leite das granxas”, critican.
A propia conselleira de Medio Rural, Rosa Quintana, dou conta no Parlamento esta semana de situacións anómalas que estaba a detectar no sector, co caso dunha industria que está pagando 2 céntimos menos por litro que a media do sector.
A OPL considera que as recentes multas que Competencia lle impuxo ás industrias están sendo claramente trasladadas ós produtores, “sen que desde a Administración se faga nada”. A organización anima a todos os gandeiros a sumarse á mobilización que programou para o 24 de marzo ante a Xunta, en Santiago; así como a participar na folga de entregas de leite que se inicia na noite do 29 de marzo. A próxima semana, a OPL ten previstas asambleas informativas en Lalín, Arzúa, Santa Comba e Lugo.
A Organización de Productores de Leche (OPL) é unha organización empresarial de carácter apolítico e autofinanciada que ten ámbito estatal, se ben a maior parte da súa dirección está en Galicia, onde conta con arredor de 500 gandeiros, según as estimacións da propia organización.
