Galego
Reproducimos a continuación o último aviso fitosanitario da Estación Fitopatolóxica do Areeiro, dependente da Deputación de Pontevedra, sobre os tratamentos fitosanitarios recomendados para as árbores froiteiras durante os meses de outono-inverno:
Aínda que de momento non se están rexistrando as temperaturas baixas propias desta época, e tampouco no período vexetativo houbo problemas graves de patóxenos, é recomendable realizar unha aplicación cun produto cúprico rexistrado no cultivo co fin de reducir o inóculo para a próxima campaña.
Ademais, con este tratamento tamén quedan protexidas as microferidas provocadas na caída da folla ou, no caso do kiwi, tamén as producidas despois da recollida do froito.
“É un bo momento para retirar as trampas para orugas e destruílas”
Os funxicidas de cobre débense aplicar a doses altas, e poden ser renovados unha vez máis ao longo do inverno, sempre que as temperaturas non sexan excesivamente baixas e non exista tampouco previsión de xeadas para os días sucesivos.
No caso da maceira, se se instalaron no verán bandas de cartón ondulado nos troncos das árbores para atrapar orugas invernantes de Cydia pomonella, é un bo momento para retiralas e destruílas.
