Consellos para tratar froiteiras danadas polo temporal

A Estación Fitopatolóxica de Areeiro subliña que as choivas favorecen a entrada de patóxenos

Publicidade
Consellos para tratar froiteiras danadas polo temporal

Os técnicos recomendan eliminar os froitos podres que quedan nas árbores ou no chan.

A Estación Fitopatolóxica de Areeiro, centro dependente da Deputación de Pontevedra, vén de publicar un aviso fitosanitario no que aconsella tratar canto antes as árbores danadas polo temporal para evitar a entrada de patóxenos. Así mesmo, con motivo das choivas e a elevada humidade existente, advirte da necesidade de actuar sobre todo nos cítricos, froiteiras e o buxo para evitar infeccións.

Segundo explica a técnica Rosa Pérez, responsable da Unidade de Artrópodos, moitas árbores sufriron roturas de polas de grandes dimensións acompañadas de rachos irregulares que, ou ben afectan a parte do tronco, ou ben deixan un toco que pode podrecer co paso do tempo. O consello fitosanitario, pois, pasa por igualar os rachos e por eliminar os tocos, aplicando despois destas operacións produtos cicatrizantes con funxicidas para evitar a entrada de patóxenos a través das feridas.

En canto aos cítricos, Pérez explica que as choivas e humidade favorecerán as infeccións por patóxenos moi ligados á auga (como a Phytophthora hibernalis), polo que indica que é moi importante recoller tanto os froitos caídos ao chan como os podres que permanecen na árbore e destruílos para evitar novas contaminacións. Tamén se debe evitar calquera acumulación de auga no contorno das raíces, favorecendo a saída mediante zonas de drenaxe. Proponse ademais a posibilidade de actuar preventivamente nos limoeiros, mandarinos, laranxeiros ou pomelos con diferentes produtos específicos.

Nas froiteiras é conveniente aplicar tratamentos de cobre tan axiña como o tempo o permita

Para as froiteiras en xeral -tanto nas de pebida como nas de óso ou no kiwi- sublíñase que será conveniente, tan pronto o clima o permita, aplicar un dos tratamentos cúpricos que se recomendan no inverno.

Sobre o buxo, advírtese que as mesmas condicións de elevada humidade poden favorecer o desenvolvemento do fungo Cylindroclaudium buxicola, que causa serias defoliacións nestas plantas. “Por este motivo débese incrementar a vixilancia sobre as sebes de buxo, retirando posibles follas secas e favorecendo a aireación das plantas. Se ademais se detectasen síntomas da presenza do fungo, débese aplicar un tratamento funxicida”, destacan en Areeiro.

Couza da pataca
Por último, a Estación Fitopatolóxica fai un chamamento á calma na provincia de Pontevedra en relación á praga da couza ou polilla guatemalteca da pataca, pois polo de agora só está presente no norte das provincias da Coruña e de Lugo, pero non en Pontevedra.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información