Galego
A Asociación de Produtores de Aceite e Oliva de Galicia (APAG) celebra este sábado xunta xeral ordinaria dos seus socios no Centro Cultural de Maside (Ourense), a partir das 10:00 horas.
Na asemblea, como orde do día, trataranse os seguintes temas:
-Informar sobre o estado do estudo e recuperación de variedades de oliveira autóctonas galegas.
-Situación da Denominación de Orixe Protexida Aceite de Galicia.
-Elaboración do dossier de boas prácticas no oliveiral, acordado entre a maioría de socios, buscando un manexo do oliveiral respectuoso co medo ambiente.
-Situación da web www.apag.gal
-Proposta de excursión para visitar oliveirais tradicionais.
-Propostas de nova directiva se as houbese.
-Captación de novos asociados.
-Rogos e preguntas.
Tras a asemblea farase unha pausa para o xantar e ás 16:00 horas, renovarase cun charla sobre a elaboración do aceite de oliva virxe extra e como diferenciar os diferentes tipos de aceites de oliva do mercado. Esta será impartida por José Galán. Ademais, se o tempo o permite, visitarase unha plantación de 2700 oliveiras e ano e medio, nas inmediacións de Maside.
A continuación, celebrarase entre os socios asistentes, unha mesa redonda coloquio, onde se compartirán experiencias sobre o manexo do oliveiral en Galicia, abarcando temas como marcos de plantación, variedades, coidados, pragas, enfermidades, poda, colleita e solución de erros do pasado en oliveirais de Galicia.
APAG agrupa a 51 socios cunhas 85.000 oliveiras
APAG nace no ano 2015 co obxectivo de reunir nun mesmo organismo a todos os produtores de Aceite e Oliva do territorio galego para asesorar tecnicamente aos socios sobre o Aceite de Oliva virxe extra e a oliveira, desde a plantación ata a recollida da oliva. No seu primeiro ano de andaina, conta con 51 socios das catro provincias galegas que suman un total de 85.000 oliveiras.
Seguindo coas actividades e accións para a posta en valor do aceite e a oliva galega, a asociación solicitou a denominación de orixe protexida “DOP Aceite de Galicia”. Con iso pretende diferenciar os aceites de oliva virxe extra galegos fronte a outros foráneos e recoñézallos no mercado pola súa contrastada calidade, aínda que polo momento, non pola súa cantidade.
