Medio Rural estuda cambios na lexislación de verteduras ilegais nos montes

A Asociación Forestal de Galicia solicita que non se sancione ós propietarios como responsables, xa que en realidade son os perxudicados. Pide modificacións tamén na normativa sobre asadeiros nos montes

Publicidade
Medio Rural estuda cambios na lexislación de verteduras ilegais nos montes

Asadeiro no lago Castiñeiras, en Marín.

A Asociación Forestal de Galicia mantivo un encontro co director xeral de Ordenación e Produción Forestal, Tomás Fernández Couto, para abordar, entre outras cuestións, o problema das verteduras ilegais nos montes.

O colectivo lembra que a lexislación vixente converte ós propietarios forestais en responsables das verteduras, cando o normal é que non sexan culpables, senón vítimas. O custo económico da eliminación de residuos nos montes e o pago das correspondentes sancións ten chegado a representar ata 10.000 euros nun ano para algunha comunidade de montes, segundo asegura a Asociación Forestal de Galicia.

Desde os colectivos de propietarios levan anos solicitando a eliminación da normativa de sancións á propiedade. “Dada a enorme proliferación das verteduras ilegais nos montes e a gravidade dos problemas ambientais que producen, tamén sería desexable unha maior adicación policial á identificación dos responsables deste delito”, valoran.

O director xeral, segundo a Asociación, comprometeuse a revisar a lexislación vixente para que, no futuro, o propietario do monte que sofre vertidos ilegais non sexa declarado responsable dos mesmos.

Asadeiros en espazos recreativos
Outra cuestión abordada na recente reunión que mantivo a Asociación Forestal con Fernández Couto é a dos asadeiros nos montes. Na época de alto risco de lumes, a Xunta prohíbe a realización de barbacoas nos espazos recreativos e parques forestais dos montes galegos. Esa lexislación vén suscitando periódicas queixas, sobre todo nas áreas periurbáns das Rías Baixas, como Vigo, onde a Asociación Forestal de Galicia calcula que cada fin de semana arredor de 10.000 persoas acuden ós parques forestais dos montes veciñais.

Medio Rural avanzou en xuño deste ano a súa intención de permitir instalacións específicas, que se autorizarán de xeito individual, para facer as barbacoas nos meses de alto risco de lumes. A Xunta anunciou a súa intención de que os primeiros asadeiros legais poidan funcionar en puntos como Vigo ou o entorno do lago Castiñeiras, en Marín, onde xa se puxo en marcha. Entre os requisitos que valoraba a Xunta para as novas instalacións, figuraba a obrigatoriedade de contar cun teito e unha base que as illase da terra.

A Asociación Forestal de Galicia é partidaria de que se aproben infraestruturas que sexan unha adaptación das existentes, evitando estruturas novas que implicarían maiores gastos e custos de mantemento. Solicita tamén que se teña en conta a contorna na que se ubica o asadeiro. Por parte de Medio Rural, insistiuse en que os asadeiros deben contar con seguridade abonda para evitar o risco de lumes e sinalouse que se aprobarían de xeito individual.

O colectivo de propietarios forestais, por último, pediu que haxa un catálogo público das instalacións que se vaian aprobando, a fin de que sirvan de modelo para axeitar as propostas a modelos xa autorizados.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información