Doce colectivos presentan o manifesto ‘Por un monte galego con futuro’

Formacións ecoloxistas, agrarias e do monte ligadas ó ambito nacionalista formulan unha serie de propostas que consideran alternativas ó Plan Forestal de Galicia

Doce colectivos presentan o manifesto ‘Por un monte galego con futuro’

Diego Sánchez (SLG), Belén Rodríguez (Adega), Paulo Carril (CIG) e Manuel Dacal (Fruga), na presentación do manifesto.

Os colectivos que promoveran o pasado ano unha Iniciativa Lexislativa Popular (ILP) a prol do bosque autóctono están a reenfocar a súa liña de traballo conxunta, logo de que o grupo popular desbotara no Parlamento a ILP. Seguindo a vía aberta con aquela Iniciativa, doce colectivos veñen de lanzar agora o manifesto ‘Por un monte galego con futuro’, no que listan unha serie de 36 propostas para a planificación forestal de Galicia.

Entre os promotores do manifesto, figuran principalmente colectivos agrarios, do monte e ecoloxistas ligados ó ámbito nacionalista, coma Adega, a Organización Galega de Comunidades de Montes, a Fruga ou o Sindicato Labrego. Estas formacións inciden en que o actual contexto de cambio climático obriga a repensar os sistemas forestais, coidando factores como a regulación do ciclo da auga ou a conservación da biodiversidade.

“Hai que ir máis alá de ver o monte como mero reservorio de carbono que capta gases de efecto invernadoiro, pois iso levaría a potenciar o cultivo do eucalipto e doutras especies de crecemento rápido”, cuestionan. Os doce colectivos que asinan o manifesto consideran que o eucalipto ten xa unha presenza excesiva en Galicia, polo que propoñen unha moratoria no seu cultivo, así como un plan para a reducción da súa superficie actual, en especial en zonas de protección da natureza e nas plantacións ilegais en terras agrarias.

A presentación do manifesto desenvolveuse nunha rolda de prensa con participación de Diego Sánchez (Sindicato Labrego), Belén Rodríguez (Adega), Paulo Carril (CIG) e Manuel Dacal (Fruga). Na rolda de prensa, pediuse a retirada do Plan Forestal de Galicia, en fase de tramitación, e a elaboración dun novo documento que xere maior consenso e que aposte pola conservación do bosque autóctono. Anunciouse ademais unha manifestación na segunda quincena de outubro, pois os convocantes entenden que hai un amplo apoio social as súas propostas.

Táboa de medidas

Entre as medidas que demandan, que se poden consultar no manifesto ‘Por un monte galego con futuro’, aquí enlazado, figuran as seguintes:

● Moratoria indefinida para novos plantíos de eucalipto.

● Prohibición de repoboacións con robinias, acacias, pawlonia e bambús.

● Programa de redución progresiva da superficie ocupada por eucaliptos.

● Programa de eliminación das plantacións ilegais en terras agrarias e bosques autóctonos.

● Modificación do “Decreto 163/2014 para a compensación e absorción de dióxido de carbono a través de masas forestais”, de cara a excluír as masas de eucalipto e doutras especies de crecemento rápido como sumidoiros de carbono.

● Promoción do ciclo completo da transformación da madeira en Galicia.

● Recuperación do tecido industrial dedicado aos distintos aproveitamentos forestais.

● Investimento na promoción da produción de madeira de calidade e doutros produtos do monte.

● Establecer unha reserva ecolóxica do 30% para “bosque nativo” en plantacións forestais.

● Axudas directas e exencións fiscais para o mantemento dos bosques autóctonos, mesmo con fins non produtivos, a produción ecolóxica e o aproveitamento multifuncional dos montes.

● O cumprimento estrito por parte da Administración pública das funcións de custodia, vixilancia e policía que lle outorga a normativa vixente.

● Promoción do pastoreo e a gandería extensiva como elemento natural de roza e prevención de incendios.

● Recuperación dos 100 metros de anchura para as redes secundarias de xestión da biomasa na loita contra os lumes (arredo dos núcleos de poboación), favorecendo alternativas multifuncionais para estas franxas de seguridade.

● A xestión da biomasa nas franxas secundarias e terciarias farase con recursos públicos, agás nos casos nos que os/as titulares das vivendas construísen estes inmobles fóra do ordenamento xurídico.

● Ruptura das masas monoespecíficas con faixas de separación de 100 metros por cada 50 hectáreas de eucaliptos, e de 50 metros por cada 50 hectáreas de piñeiros.

● Incremento das distancias das plantacións forestais a terras de cultivo, ríos, zonas habitadas, vías de comunicación, etc.

● Potenciar a mobilidade de terras abandonadas a través do Banco de Terras, como ferramenta de acceso á terra para o desenvolvemento de actividades agrarias, principalmente por persoas labregas.

● Retirada das comunidades de montes como suxeito pasivo no Imposto sobre Sociedades e elaboración, desde Galiza, dunha fiscalidade axustada á figura e ás funcións dos montes veciñais.

image_print

4 ideas sobre “Doce colectivos presentan o manifesto ‘Por un monte galego con futuro’

  1. Stop carballo adiante eucalipto

    Xa están os de sempre coas suas teimas. Mellor poderían pedir voltar a andar coa vaca pola corda, cambiar as vitrocerámicas pola lareira e o pote, so andar con zocas….
    Menudo fato de langráns xustificando con mentiras os seus postulados e tentando que as minorías cidadanitas se impoñan ás xentes do rural.
    Mellor que estén quietiños non vai ser que teñamos que realizar in ILP para eliminar todas esas asociacións chiringuitos que viven das subvencións.

    Contestar
    • Adiante as landras, stop landrús

      Minorías cidadanitas? o 70% da poboación galega vive en concellos urbanos.
      Mentiras? Desde o ano 2000 ao 2015, Galicia pasou de 170.000 a 65.000 empregos no sector primario. A Xunta recoñece que hai 425.000 has de eucaliptos, cando o Plan Forestal estimaba 245.000 has no 2032.

      Pero é que ademais ENCE compra 3 millóns de toneladas de eucalipto a 30 e pico euros/tonelada e vende 1 millón de toneladas de celulosa a 1.000 €/tonelada -e recoñece un custo de 325€/ton na produción- co que claramente o negocio do eucalipto é un calote moi ben montado: a poboación leva a perda de diversidade, o risco de incendios, a perda de nacedoiros de auga e mais un 3% do beneficio para o produtor. O 97% do beneficio, para a pasteira.

      Iso sen falar da contaminación da chamada “biofactoría”, da perda de produtividade dos bancos marisqueiros de Placeres en particular e de toda a ría en xeral -que inda así facturan máis de 15 millóns de euros ao ano- ou de como o piñeiro, con volumes de corta máis modestos, mantén moitos máis postos de traballo vinculados ao sector en aserradoiros, etc.

      Faixas de seguridade, rozas, medidas de prevención…para que, verdade? Só hai que lembrar a traxedia de Portugal ou todas as mortes que ten habido aquí nos incendios para entender por que se piden esas cousas.

      Afortunadamente, a maioría da poboación -rural e urbana- ten claro o que hai co eucalipto.

      Contestar
  2. O eucalipto non é rentable

    Algún vai levar un disgusto co eucalipto. Sen entrar xa nos criterios ecolóxicos, falemos de criterios económicos, que son os únicos que interesan aos que plantan eucalipto.
    – A ver se pensamos que o feito de que todo o mundo estea a plantar eucalipto non vai influir no seu prezo de venda. As empresas teñen máis onde escoller e o normal é que fagan poxas á baixa.
    – A ver se pensamos que o contexto de crise que nos están a pintar nos medios de comunicación non vai vir acompañado dun descenso na demanda de pasta de papel e de enerxía.
    – A ver se pensamos que os madeiristas nos van vin cortar o eucalipto nunha finca en pendente, sen acceso para maquinaria e que non ten nin 3000 m2.

    En fin, nada novo baixo o sol. A xente pensa que se vai facer rica con cortas de 12 anos de eucalipto, pero se botasen contas en vez de facerlle caso ao interesado de turno se cadra levaban unha sorpresa.

    Contestar
  3. Elías Gómez Rivas

    Como cidadán que vivo do monte , eu propoño un monte diversificado con novas plantacións de autóctonas con mellora xenética ( castaño resistente a tinta etc…) convivindo con piñeiros e eucalíptus, pois estas especies tamén son necesarias pa industría galega. E dicir cada propietarío debería estar obrigado a plantar un porcentaxe da superficie con autóctonas , sendo estas subvencionadas, e o resto a eucaliptus piñeiros etc… que lle darían ingresos a corto prazo e as autóctonas a longo prazo evitando así o monocultivo e creando o mesmo tempo un hábitat para a fauna e flora (nos eucaliptais non hai nin fungos nin liquens nin rans etc…)

    Contestar

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información