Constituidas en Galicia as primeiras Sociedades de Fomento Forestal (Sofor)

Medio Rural informa da creación de dúas no 2014 e da aprobación de tres no 2015, unhas cifras que considera un éxito, en tanto a oposición cualifícaas de fracaso

Constituidas en Galicia as primeiras Sociedades de Fomento Forestal (Sofor)

O monte en Galicia presenta unha alta parcelación.

En Galicia, o minifundio do monte é un problema que dificulta a xestión e o aproveitamento forestal. Hai preto de 700.000 propietarios de monte, cada un con parcelas dispersas que rondan de media os 2-3 ferrados. Esa situación tratouse de correxir desde administración galega coa promoción no 2012 das Sociedades de Fomento Forestal (Sofor), un instrumento que permite a agrupación de propietarios forestais para facer un aproveitamento conxunto das súas terras. Polo de agora, constituironse dúas Sofor no 2014 e hai tres aprobadas no 2015, segundo os datos de Medio Rural.

O secretario xeral de Montes, Tomás Fernández Couto detallou no Parlamento as cifras e perspectivas das Sociedades de Fomento Forestal. No 2013, Medio Rural recibiu unha solicitude para a creación dunha Sofor, no 2014 recibiu tres –das que dúas creáronse formalmente-, e no que vai do 2015 tivo cinco solicitudes, das que tres están aprobadas. Fernández Couto considerou como un “éxito” o desenvolvemento que están experimentando as Sofor e lembrou que este ano convocáronse axudas para a súa creación e consolidación por importe de 232.000 euros.

Fiscalidade
Pola súa banda, os grupos da oposición tildaron de “fracaso” o modelo das Sofor e advertiron de que non eran de interese dos propietarios forestais pola fiscalidade “perxudicial” que presentan. “O propietario que se integre nunha Sofor ten que facer fronte a uns impostos medios do 33% pola corta de madeira, en tanto o propietario individual a pouco máis do 8%”, sostivo o deputado de Alternativa Galega de Esquerda Antón Sánchez.

“O modelo de Sofor tivo nove solicitudes en tres anos. As Uxfor, 45 en 6 meses” (Antón Sánchez)

Desde Alternativa Galega de Esquerda solicitaron a recuperación da figura das Unidades de Xestión Forestal (Uxfor), un instrumento de ordenación do monte que fora impulsado polo Goberno bipartito no 2008 e logo desbotado polo Partido Popular. “As cifras son claras. O seu modelo de Sofor tivo nove solicitudes en tres anos. Coas Uxfor, recibíronse 45 solicitudes en 6 meses”, comparou Sánchez.


Participación dos propietarios

O grupo popular incidiu en que a participación nas Sofor era voluntaria por parte de todos os propietarios, en tanto as Uxfor podían poñerse en marcha cunha maioría ampla de propietarios, obrigando ós demais a sumarse, un “intervencionismo” co que o Pp sinalou que non estaba de acordo.

Desde a oposición, sen embargo, defenderon o modelo de intervención das Uxfor: “É o mesmo que pasa coas reestruturacións parcelarias (antigas concentracións parcelarias) que veñen de aprobar no Parlamento. Se hai máis dun 70% dos propietarios que apoian unha parcelaria, esta faise”, defendeu Sánchez. O Psoe, pola súa banda, sinalou que o modelo das Sofor podía convivir co das Uxfor. Tanto o Psoe como o Bloque estiveron de acordo na iniciativa de Alternativa Galega de recuperar as Uxfor, unha proposta que foi rexeitada polo Pp.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información