Confemadera fai as paces coa Consellería do Medio Rural

A Xunta Directiva de Confemadera Galicia acordou retomar o seu traballo na Mesa da Madeira e o Consello Forestal despois de que a Consellería do Medio Rural atendese algunhas das demandas estratéxicas do sector, realizadas durante varios anos, e que non tiveran resultados positivos. Así llo comunicou á conselleira do Medio Rural, Ángeles Vázquez, durante unha reunión celebrada este martes pola tarde en Santiago.

A Xunta Directiva considera que se produciu un “cambio de actitude na Consellería” cara ao sector nos últimos meses, xa que o equipo que dirixe Ángeles Vázquez “promoveu solucións a algunhas das demandas, como se solicitou”.

Así, Confemadera destaca o compromiso de cambio no Plan de Desenvolvemento Rural de Galicia (PDR 2014-2020) que permitirá eliminar a limitación que deixaba fóra destes fondos aos serradoiros cun consumo superior aos 10.000 m3 de madeira. Ademais, como medida temporal, Medio Rural habilitou unha liña de axudas con fondos propios, dotada con 600.000 euros, para atender as necesidades de investimento das empresas.

As empresas valoran “positivamente que o sector vaia a contar cun novo Plan Forestal que responda as necesidades actuais do sector e que se vaia dotar con recursos económicos”.

Grupo de traballo coa Fegamp para unificar as ordenanzas municipais de corta de madeira

Confemadera tamén destaca a decisión de crear un grupo de traballo promovido pola Fegamp e Medio Rural, na que participan técnicos de ambas as institucións e de Confemadera Galicia, co obxectivo de unificar os diferentes tipos de ordenanzas municipais que están en vigor, para lograr un modelo único para todos os municipios.

“Esta é unha das demandas históricas do sector que afecta á competitividade das empresas”, subliñan desde a asociación.

Confemadera: “Pasouse das palabras aos feitos”

Confemadera Galicia considera que a interlocución coa Consellería do Medio Rural “mellorou de maneira significativa” e permitiu que o sector e a administración logren solucións concretas aos problemas das empresas. “Pasamos das palabras aos feitos”, explicou a Xunta Directiva.

Con todo, a patronal reitera que é necesario 2seguir traballando de maneira coordinada” para mellorar a competitividade do sector. Por iso, subliña que o documento As 13 medidas para o sector forestal, presentado á Administración fai máis dun ano, “segue vixente e están pendentes algunhas peticións como a agrupación da propiedade ou incentivar o investimento no monte”.

Revisión do Plan Forestal de Galicia

Pola súa banda, a conselleira do Medio Rural, Ángeles Vázquez, felicitou este xesto de Confemadera de volver á Mesa dá Madeira e ao Consello Forestal porque “xuntos podemos conseguir máis por un sector tan estratéxico como é o da madeira para a nosa Comunidade”. Ángeles Vázquez acordou seguir estudando as peticións realizadas por esta Confederación e o resto de axentes para traballar de maneira coordinada e eficiente.

A conselleira lembrou que actualmente se está traballando na revisión do Plan Forestal de Galicia, mediante un grupo de traballo específico composto por 2 coordinadores e 26 membros en representación da Administración autonómica, universidades galegas, propietarios e empresas forestais, empresas de servizos, colexios profesionais, grupos ecoloxistas e sindicatos do sector. “Trátase pois adecuar o modelo de monte ás novas circunstancias, demandas e tendencias emerxente, tanto en Galicia como a nivel nacional e internacional”, aseguran desde a Consellería.