Unións Agrarias asegura que a gran maioría dos gandeiros do concello de Cervantes están sen cobrar as axudas da PAC correspondentes ao 2018. O problema, sinala a organización, débese á inspección de superficies a que foi sometido o concello o pasado ano, da que aínda non se emitiron as correspondentes actas. Unións urxe ó Fondo Galego de Garantía Agraria (Fogga) a rematar os trámites con axilidade, pois estase a retrasar tanto o cobro da PAC como a solicitude das axudas da campaña 2019.
A organización agraria lembra que nos meses de setembro e outubro de 2018 realizouse unha inspección de superficies no concello de Cervantes, o cal motivou que os gandeiros só cobraran unha pequena parte das axudas da PAC (as que non están vinculadas a superficie). Logo de facer estas inspeccións, débeselle entregar unha acta das mesmas ós gandeiros/as nas cales se reflexen as incidencias en caso de que as houbera, pero a día de hoxe os gandeiros nin teñen as actas nin data para recollelas, cando noutros concellos da comarca xa foron entregadas en febreiro.
A ausencia das actas está a retrasar o cobro das axudas correspondentes ó 2018 e dificulta as xestións das do 2019. Unións pídelle ó Fogga de Lugo que axilice os trámites.