Estes días celebrouse en Pontevedra a feira de produtos gourmet Etiqueta Negra, un evento no que se amosou a potencialidade da produción de té en Galicia. A Estación Fitopatolóxica do Areeiro, dependente da Deputación de Pontevedra, organizou catas e maridaxes do té que produce nas súas instalacións para amosar as posibilidades do cultivo.
A infusión é producida a partir das follas da planta do té, a ‘camelia sinensis’. O proceso de fermentación das súas follas é a que determina a variedade do té. En Galicia, hai un clima e unha humidade favorables para o cultivo da ‘camelia sinensis’, segundo explicaron desde Areeiro.
“Coa participación da Estación Fitopatolóxica na feira gourmet cumpriuse o obxectivo de amosar as potencialidades do té en Galicia. Despois das degustacións houbo moita xente que preguntou onde se podía mercar, polo que está claro que é unha aposta interesante a desenvolver”, sinalou a deputada Eva Villaverde.
Preparación
As degustación na feira correron a cargo do especialista e catador Carlos Riaño, que salientou as características do té do país, ofrecendo indicacións sobre as posibles formas de preparación. Tamén se fixeron maridaxes con outros produtos da terra, como o queixo ou os berberechos.
En canto á preparación do té, o experto recomendou que a auga non chegara a ferver, quedándose nos 80-90 graos. O tempo de repouso da infusión dependerá da variedade: para o té verde recomendou 2 minutos e para o té negro 4-5 minutos.