Galego
Preto de cincuenta asociadas á cooperativa Xallas, centrada en insumos e servizos agrarios, asistiron esta mesma mañá, á xornada “Atrévete Contigo Mesma”, impartida por dúas técnicas da Asociación Galega de Cooperativas Agroalimentarias especializadas en igualdade e motivación empresarial.
O eido do cooperativismo agroalimentario conta en Galicia con arredor de 13.000 persoas asociadas en máis de 80 cooperativas, segundo os Informes Económicos de AGACA. Só o 12% destas entidades ten mulleres no Consello Reitor, malia seren o 49% da masa social.
Neste contexto incidiu a primeira parte da charla, na que se listaron a falta de tempo e de preparación como principais causas da escaseza de socias implicadas nos consellos reitores: o 47% das cooperativistas non dispón de nada de tempo libre para disfrute persoal e arredor do 17% alega falta de formación ou non sentirse capacitada para un posto de responsabilidade.
A segunda metade da Xornada invitou á participación das asistentes, coas que se debateu sobre os servizos que deberían incorporar as entidades para fomentar a participación das mulleres en asembleas, votacións e reunións societarias, pero tamén aspectos como a visibilización das capacidades das mulleres do medio rural e xeitos de lograr unha axeitada conciliación entre a vida profesional e laboral (só o 9% das parellas de cooperativistas recoñece un reparto equitativo das tarefas domésticas).
José Manuel González, presidente de Xallas, destacou durante a inauguración da xornada “a importancia que as mulleres socias teñen para o crecemento da entidade”.
Empoderamento
O obxectivo do programa “Atrévete Contigo Mesma” é servir de motivación ás mulleres asociadas a cooperativas para que se involucren activamente na toma de decisións e no desenvolvemento dos aspectos máis empresariais das cooperativas.
AGACA e Obra Social “la Caixa”, entidades organizadoras, continúan así o seu compromiso coa igualdade de xénero.
