O endurecemento dos controis das ITV sobre os tractores está deixando nos últimos meses casos pouco comprensibles para os profesionais. Hai enganches de tractores non homologados que pasan a inspección e outros idénticos que son rexeitados. Unións Agrarias demanda un criterio único e advirte dos problemas que lle xera ós gandeiros a obriga de cambiar o enganche e de homologalo: máis de 1.200 euros de gasto e numerosos trámites.
A lexislación obriga en teoría a que tódolos tractores posteriores a 1994 conten cun enganche homologado, se ben é unha cuestión sobre a que as ITV agrícola non fixeran incidencia ata o de agora, pois eran conscientes de que se obrigaban a cumprir a lei ó pé da letra, pararían a todo o sector. O cambio de criterio das ITV, endurecendo agora os controis sobre os enganches, está a xerar problemas no agro, con casos que teñen difícil explicación.
Un dos casos detectados sucedeulle en persoa ó responsable de Unións Agrarias na comarca de Ordes, Anxo Dono, que se atopou recentemente con que o seu tractor John Deere, adquirido no ano 2004, suspendía a inspección polo enganche do tractor. A sorpresa foi que un veciño, cun enganche idéntico no mesmo modelo de tractor e cos mesmos cabalos que o seu si pasou a inspección.
“A única diferencia é que o outro tractor tiña un ano máis de antigüidade -conta Anxo Dono-. Cando consultei o caso, o que me dixeron é que o outro veículo era anterior ó ano 2004, que é o ano a partir do cal parece ser que estaban controlando a homologación dos enganches -cuestión que non figura en ningunha normativa-. Ou sexa, que podes ter un enganche medio colgando nun tractor de 20 ou 25 anos e non pasa nada. O normal é que sexan ou todos ou ningún”, critica.
Ningún dos dous enganches estaba homologado, a pesar de que ambos tractores saíran con el equipado do concesionario. “Cando falas co concesionario, dinche que daquela o enganche valía, pero agora estámonos comezando a atopar con rexeitamentos na ITV, como foi o meu caso e outros semellantes”, explica Anxo Dono.
A solución nun caso así pasa pola compra doutro enganche e por solicitarlle a súa homologación á casa fabricante do tractor, un proceso que en conxunto supera os 1.200 euros e que obriga a xestións co concesionario e coa casa fabricante do tractor. “Son moitas voltas e hai quen ademais se atopa con que o concesionario no que mercou o tractor xa pechou, co cal ten serias dificultades con tódolos trámites que hai que facer”, explica Anxo Dono.
Valoracións de Supervisión y Control
Consultada sobre o caso Supervisión y Control, a empresa concesionaria da ITV en Galicia, a súa portavoz, Carmen Fernández, limítase a explicar a situación xeral de inspección dos enganches de tractor en Galicia. Fernández sinala que é habitual a detección de incumprimentos na homologación de enganches, xa que en ocasións incorpóranse nos tractores “enganches artesanais ‘adaptados’ para a orografía galega que incumpren o requisito de homologación”.
“É preciso facer referencia á diversidade intrínseca do sector agrario, que se expresa na gran variedade de modelos e a súa antigüidade, que aplicado ademais ao enganche de remolque dificulta a inspección, debido a que se trata de elementos moi diferentes, principalmente en canto a capacidades de arrastre ou versatilidade (enganches fixos, oscilantes, barras de tiro, etc)”, expoñen desde Supervisión y Control.
“Estas características son de vital importancia para evitar os accidentes de tráfico onde se poidan ver implicados tractores e remolques, e en moitos casos ditas características descoñécense por non estar homologados ou, incluso estándoo, carecer da identificación que permita verificar a homologación (carencia de placa ou ilexibilidade da mesma polo uso do dispositivo acoplado)”, conclúe Carmen Fernández.
Que di a normativa?
Desde a Asociación Nacional de Maquinaria Agrícola (Ansemat) resumen as cuestións normativas a ter en conta cos enganches dos tractores:
– Os tractores deben equipar un enganche de remolque homologado. O enganche pode estar montado de orixe ou pode ser montado posteriormente a través dunha reforma, que debe legalizarse mediante anotación na tarxeta ITV.
– Cando o tractor vai pasar inspección nunha estación ITV, nesta comproban que o enganche estea anotado na tarxeta ITV e se está incluído na homologación de tipo do tractor.
– Se o enganche non aparece na homologación de tipo do tractor, na ITV solicítase un certificado pola reforma, que pode emitir o fabricante ou un servizo técnico de reformas.
– Se o enganche non aparece anotado na tarxeta ITV, na estación ITV solicítase un certificado de equipamento en orixe (que pode emitir o fabricante), ou un certificado pola reforma, que pode emitir o fabricante ou un servizo técnico de reformas.
Sobre a cuestión de enganches non anotados na tarxeta ITV, na Asociación Nacional de Maquinaria Agrícola (Ansemat) confirman a detección de problemas en Galicia. O responsable técnico de Ansemat, Emilio Allué, sinala que a única incidencia que se lles trasladou últimamente sobre enganches -“xeralmente en Galicia”- refírese a enganches que non aparecen anotados nas tarxetas ITV.
“Nas tarxetas ITV de tamaño cuartilla, anteriores ao ano 2010 e reguladas segundo o antigo Real Decreto 2140/1985, en ocasións non se reflectía o equipamento en orixe do enganche. Isto debíase a que o citado real decreto indicaba que había que reflectir o dispositivo de acoplamento na tarxeta ITV nun campo que non existía no formato de tarxeta do propio real decreto. É unha circunstancia que se pode resolver cun certificado de equipamento en orixe por parte do fabricante”, destaca Allué.