Comezan os traballos para poñer en produción 250 hectáreas abandonadas de Cualedro

Publicidade
Comezan os traballos para poñer en produción 250 hectáreas abandonadas de Cualedro

Os directores xerais da Axencia Galega de Desenvolvemento Rural (Agader), Miguel Pérez Dubois, e de Gandaría, Agricultura e Industrias Agroalimentarias, José Balseiros, supervisaron este luns as actuacións de acondicionamento para a posta en marcha dun proxecto de recuperación de terras agrarias no concello ourensao de Cualedro.

Ambos destacaron a boa marcha dos traballos, que se desenvolven en terreos de varias reestruturacións parcelarias abranguendo unha superficie total de arredor de 250 hectáreas, a demanda dos propios interesados. Así, os labores consisten principalmente no acondicionamento das parcelas mediante a súa roza, para adecuar os terreos co fin de aproveitalos desde o punto de vista agrícola e gandeiro. O uso futuro dos predios será, fundamentalmente, o seu aproveitamento como pasteiros.

Actualmente están xa contratados traballos de recuperación e adecuación nas zonas de concentración parcelaria de Cualedro-Carzoá-Vilela e de Xironda-Pedrosa, por un importe que se aproxima aos 200.000 euros.

Como labores complementarios, están tamén en marcha os relacionados coa posta a disposición dos terreos por parte dos propietarios para a incorporación das parcelas ao Banco de Terras e os traballos para a elaboración de contratos de arrendamento por parte dos interesados en facer uso delas.

Esta actuación en Cualedro é unha das postas en marcha pola Consellería do Medio Rural para loitar contra o abandono e mobilizar terras en desuso en diferentes puntos de Galicia.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información