Amando Ordás Pérez, unha vida adicada á ciencia dende a MBG

Recentemente xubilouse Amando Ordás Pérez, profesor de investigación do Consello Superior de Investigacións Científicas (CSIC) que dedicou máis de 40 anos da súa carreira a investigar na Área das Ciencias Agrarias dende a Misión Biolóxica de Galicia (MBG), centro do que foi director durante 14 anos

Publicidade

Recentemente xubilouse Amando Ordás Pérez, profesor de investigación do Consello Superior de Investigacións Científicas (CSIC) que dedicou máis de 40 anos da súa carreira a investigar na Área das Ciencias Agrarias dende a Misión Biolóxica de Galicia (MBG), centro do que foi director durante 14 anos, período durante o cal se constituíron catro dos seis grupos de investigación que o citado instituto ten na actualidade. Amando Ordás tamén foi coordinador institucional do CSIC en Galicia de 2002 a 2006.

Polo tanto, no seu perfil cabe destacar unha vertente investigadora, avalada por datos como a publicación de máis de 200 artigos científicos, e unha vertente xestora, durante a cal tivo que facer fronte a momentos con dificultades nos cales ata se barallou o peche da MBG, e promover a modernización da estrutura e funcionamento do centro.

Nas próximas semanas dende a MBG promoveranse varios actos de recoñecemento, actos que servirán tamén para celebrar que continuará vinculado ao centro a través da figura de doutor ad honorem, o que lle permite seguir traballando no centro estando xubilado. É, polo tanto, un bo momento para poñer en valor a súa figura e rendelo dende a MBG un máis que merecida homenaxe.

Amando Ordás Pérez naceu en 1945 en León. Estudou na Escola Laboral de Córdoba, e posteriormente, cursou a carreira de Enxeñeiro Agrónomo na Escola Técnica Superior da Universidade Politécnica de Madrid (UPM). Tras iso, cursou un Máster of Science na Universidade de Minnesota (EUA). En 1974 obtivo o título de doutor pola Universidade Politécnica de Madrid cunha tese sobre mellora de millo.

Incorporouse á MBG no ano 1974, onde promoveu por todas as categorías investigadoras: colaborador científico (1975), investigador científico (1988) e profesor de investigación (2000).

Refundador do programa de mellora xenética do millo na MBG

As súas liñas de investigación centráronse na xenética vexetal e a mellora xenética, campos nos que logrou importantes fitos científicos. Así, por exemplo, cabe citar que na década dos 70 refundou o programa de mellora xenética de millo tras a perda do programa instaurado por Cruz Gallástegui nos anos 20. Para iso, comezou coa recolección de variedades autóctonas de millo e creou un banco de xermoplasma. Tamén rexistrou diversas variedades de millo, estableceu un patrón heterótico – sistema de hibridación de millo – entre o norte e o sur de España, logrou importantes avances no coñecemento da estrutura xenética do millo español e puxo en marcha varios programas de mellora a longo prazo que seguen en plena vixencia, entre os que poden citarse o primeiro programa de mellora de millo doce europeo e o único programa de mellora de millo de flocos de millo que existe na actualidade no sector público.

Posteriormente, iniciou a recollida de biodiversidade vexetal doutros cultivos, especialmente brásicas (coles, nabizas, grelos…) que, cos anos, daría lugar ao actual grupo de investigación de brásicas e así mesmo incentivou os inicios do programa de investigación de leguminosas (feixóns e chícharos).

Co grupo de mellora de millo que funda Amando Ordás Pérez, a Misión Biolóxica inicia a súa etapa de produción científica moderna na que o histórico centro – que foi o primeiro instituto de investigación agraria de España e un dos primeiros de Europa – pasa a situarse entre os centros destacados de ciencias agrarias de España, con índices de produción por enriba da media da súa área científica.

Na súa tarefa investigadora cabe destacar, ademais, o seu labor no campo da formación de mozos investigadores. Así, dirixiu nove teses doutorais e trasladou aos seus bolseiros a paixón pola investigación e o bo facer científico.
Ao seu labor investigador na MBG únese o seu labor como docente, a través da figura de profesor asociado na Escola de Enxeñeiros Técnicos Forestais da Universidade de Vigo, e no Instituto Agronómico Mediterráneo de Zaragoza, onde desenvolveu un extraordinario labor docente.

Despois deste frutífero e incansable labor, Amando Ordás Pérez continuará colaborando coa MBG na súa nova etapa de profesor ad honorem, o que para o centro supón a posibilidade de aproveitar a sabedoría e experiencia acumuladas durante unha longa carreira científica e o seu entusiasmo pola ciencia. Como discípulo seu, dou grande importancia á súa participación nos proxectos actuais do grupo de investigación e a súa opinión constitúe para min unha garantía de sensatez e bo xuízo ante calquera incerteza.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información