A sala de despece de Artesanos Gallegos de la Carne (Castro de Rei, Lugo), que entrou en concurso de acreedores a comezos de ano, ten unha oferta de compra por parte de Coren, segundo publica hoxe El Progreso. A oferta de Coren pola planta estaría en 1,9 millóns de euros, segundo o xornal lucense. Tras trascender esta proposta, chegan as reaccións. Unións Agrarias, que representa no concurso de acreedores a 60 gandeiros con débedas con Artesanos Gallegos, fai un balance dual.
A organización agraria considera importante que haxa ofertas pola planta que permitan retomar a súa actividade, pero tamén avoga por un prezo de compra que posibilite enfrontar as débedas cos gandeiros. Desde Unións, o seu responsable de vacún de carne, José Ramón González, sinala que os 60 gandeiros individuais con débedas acumulan uns impagos de máis de 600.000 euros.
A oferta de Coren, segundo publica El Progreso, só faría fronte ás débedas cos traballadores e a créditos privilexiados, pero non aos arredor de catro millóns de euros que lle adebeda Artesanos Gallegos de la Carne a gandeiros e cooperativas. Desde Unións sinalan en nota de prensa que hai marxe para ofertas superiores, pois o informe do administrador concursal reflicte a existencia duns “10 millóns de euros en activos” de Artesanos Gallegos de la Carne.
Coren, consultada ao respecto da súa oferta, non fixo polo de agora ningunha valoración.