Perspectivas de produción e prezos nos mercados de carne

O vacún arrastra un aumento dos sacrificios por mor da seca e a falta de forraxes en boa parte de Europa, o que presionou os prezos á baixa. En porcino espérase unha baixada no 2019, en tanto a avicultura mantén cotizacións por riba da media dos últimos dous anos

Perspectivas de produción e prezos nos mercados de carne

Canais de vacún nun matadoiro galego. / Arquivo.

Os mercados europeos de carne están a acadar en xeral no 2018 bos datos de produción e consumo. Hai crecementos tanto en vacún coma en porcino, avicultura e en ovino e cabrún. Para o 2019 espérase que se manteña o crecemento en avicultura e en ovino, se ben en carne de vacún e de porcino haberá previsiblemente menores producións e consumos, ási coma presións á baixa nos prezos, segundo o último informe de perspectivas dos mercados agrícolas da Comisión Europea.

Resumimos a continuación a análise de cada sector que debuxa o informe da Comisión Europea.

Vacún, a seca obriga a maiores sacrificios

A produción de carne de vacún en Europa medrou un 1,6% no primeiro semestre do 2018 a causa dun volume de sacrificios maior ó habitual. A seca e a falta de forraxes en boa parte da Europa central levaron a un maior descarte de animais reprodutores, tanto en ganderías de carne coma de leite, principalmente en países coma Francia, Alemania ou Holanda.

Prezos medios en Europa en vacas (cows) 03, en xovencas (Heifers) e novillos.

Prezos medios en Europa en vacas (cows) 03, en xovencas (Heifers) e novillos.

Esa situación prolongouse durante o verán, xerando baixadas de prezos, se ben as chuvias outonais xa cambiaron o panorama e están a permitir unha recuperación das cotizacións. É posible que en inverno, a falta de forraxe almacenado leve de novo a sacrificios maiores ós habituais.

En calquera caso, a maior oferta mundial e o aumento das importacións presionarán os prezos á baixa no 2019, segundo os pronósticos do informe europeo. Este ano, as importacións están aumentando a un ritmo do 6% e para o ano medrarán outro 2%, con Brasil e Arxentina como suministradores de referencia.

No lado contrario, as exportacións evolucionan á baixa, cunha alta competencia de Brasil, Estados Unidos e Nova Zelanda nos mercados de exportación europea, coma o Magreb, Turquía ou Israel.

O caso galego é singular no mercado da carne de vacún, pois boa parte da produción de vacún de carne estase orientando a selos de calidade, coma Ternera Gallega ou Vaca Galega / Boi Galego, con prezos e demandas diferenciadas no mercado.

Porcino, temor á peste porcina africana

O mercado do porcino medrou este ano en produción, exportacións, consumo e prezos, se ben para o 2019 espérase un axuste á baixa. A boa situación de mercado levou a que España incrementase este ano a súa cabaña en 57.000 animais, segundo os datos da Comisión Europea, aínda que no 2019 é esperable un axuste da produción pola presión de prezos á baixa e menores consumos que esperan os expertos.

Unha das cuestións que máis está a preocupar no sector porcino é a progresiva expansión a Europa occidental da peste porcina africana, unha enfermidade que afecta a porcos e tamén a xabaríns. O actual brote detectouse por primeira vez en Georgia no 2007 e xa chegou no último ano a granxas domésticas de Bélxica e da República Checa. En Rumanía afectou tamén a ganderías comerciais, ocasionando grandes perdas.

O protocolo europeo está a determinar zonas de comercio restrinxido, para evitar o movemento de carne ou animais infectados; se ben xa hai 13 países -incluíndo China e Xapón- que decidiron pola súa conta vetar as importacións de toda Bélxica, un escenario que preocupa entre os grandes exportadores, coma España.

España é o principal exportador na UE, cun 22% do total de vendas ó exterior, sendo China e Xapón os mercados de referencia de Europa, xa que acumulan case a metade das vendas totais.

Avicultura, ante un escenario de maiores importacións

O sector avícola presenta tamén un balance positivo no 2018, cun aumento do 2,2% da produción e con incrementos en exportacións (+2,5%) e consumo (+1,6%). O crecemento moderarase no 2019 en todos estes capítulos, se ben o principal factor a ter en conta para o ano é o aumento previsto das importacións, que subirán un 10%, fronte ó -3% que acumulan neste exercicio.

Evolución de prezos en avicultura.

Evolución de prezos en avicultura.

A Comisión Europea espera que Brasil, o principal suministrador da UE, se recupere dos problemas de sanidade animal que atravesou este ano, o que levará previsiblemente a un aumento dos seus envíos a Europa. Ante a baixada das vendas brasileiras, este ano Europa tirou máis das importacións de Tailandia, Chile e Ucrania.

No lado das vendas ó exterior, Ghana, Ucrania e Filipinas son mercados de referencia que están a medrar.

En prezos, o mercado avícola mantense nun bo momento, con medias por riba das dos últimos dous anos. A nivel de produción, cómpre destacar tamén a auxe da carne de pavo, que medrou un 26% en relación ó 2016.

Ovino e cabrún, estable con lixeiros crecementos

O sector do ovino e cabrún preséntase como un dos sectores cun escenario máis estable. Este 2018 está a rexistrar crecementos en produción, exportacións e consumo, un panorama que se espera repetir no 2019, cun +1% en produción, +2% en exportacións e +0,9% en consumo interno. As importacións tamén subirán un 2%, segundo o informe de perspectivas debuxado pola Comisión Europea.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información