Granja Campomayor inaugura a primeira planta de pasteurización de ovo de Galicia

Con estas instalacións, Granja Campomayor convértese nunha das empresas punteiras do sector a nivel nacional. As novas instalacións, que supuxeron un investimento duns 11 millóns de euros, foron inauguradas polo presidente da Xunta de Galicia

Granja Campomayor inaugura a primeira planta de pasteurización de ovo de Galicia

Feijóo visitando as instalacións

Granja Campomayor inaugurou este mediodía as súas novas instalacións en Palas de Rei (Lugo), que inclúen unha moderna planta de posta e clasificación, así como unha de pasteurización de ovo, a primeira en Galicia, e a máis punteira de España polo tipo de tecnoloxía que utiliza.

Ao acto de inauguración das instalacións desta empresa familiar asistiron máis de 100 invitados, entre eles provedores e clientes de Granja Campomayor, así como autoridades locais e autonómicas, encabezadas polo presidente da Xunta de Galicia, Alberto Núñez Feijóo.

O director comercial de Granja Campomayor, Rodrigo García García, a cuarta xeración desta empresa familiar, destacou o importante salto que supoñen estas instalacións, nas que investiron preto de 11 millóns de euros e que permitiron a creación de 45 postos de traballo.

En especial, destacou que “a partir de agora contamos coa primeira planta de Galicia de ovo pasteurizado e unha das poucas de España nas que se produce o propio ovo que se pasteuriza”.

A planta de pasteurización de ovo máis moderna de España

Ademais, destacou que, das 20 plantas de pasteurización de ovo que existen en España, esta é a máis avanzada tecnoloxicamente. “Unha pasteurización normal chega aos 65 graos, e con este sistema mediante microondas, pioneiro en España, subimos dez graos máis a temperatura, o que permite matar máis microorganismos, aumentar a data de caducidade e mellorar a calidade do ovo”, asegura Rodrigo García.

O ovo pasteurizado é un produto que Granja Campomayor destina ao mercado galego e español. En concreto, o director comercial explica que “o cliente potencial é a industria, cátering, grandes panaderías…etc, e a clara tamén está a ter saída comercial para deportistas e persoas que seguen dietas”.

A capacidade de produción da planta de pasteurización é de 6.000 quilos por quenda de 8 horas. Rodrigo García avanza que no futuro prevén pasteurizar ovo ecolóxico e campeiro con destino á exportación fóra de España.

Unha saga familiar que pasa de 300 a 600.000 galiñas en 60 anos

Foto de familia da inauguración

Foto de familia da inauguración

Granja Campomayor fúndase a principios dos anos 40 con 300 galiñas nunha casa de labranza de Palas de Rei na que se escollían os ovos a man, un a un. Hoxe en día, as instalacións da empresa albergan 600.000 galiñas e producen 14.000.000 de ducias de ovos ao ano. Desas 600.000 galiñas, 125.000 viven en cinco naves integradas para a produción de ovo campeiro, convertendo a Granja Campomayor nun referente na produción alternativa. A empresa colabora tamén con granxeiros na produción de ovo ecolóxico e de paspallás.

Despois da visita, o Director Comercial de Granja Campomayor, Rodrigo García, lembrou ás catro xeracións familiares que “conseguiron situar á empresa no máis alto do sector”. Tamén se dirixiu aos traballadores que “activan a ilusión da empresa día a día” e lembrou que “o sacrificio, o entender a empresa como unha parte máis da familia e o amor polos animais”, foron sempre os alicerces básicos que sustentaron a empresa.

Pola súa banda, o alcalde de Palas de Rei, Pablo Taboada, falou da importancia de Granja Campomayor no desenvolvemento económico da comarca. A quenda de intervencións pechouna o Presidente da Xunta, Núñez Feijoo, que quixo destacar o papel de Granja Campomayor na economía galega. “Un dos factores esenciais que fai medrar a economía son os emprendedores comprometidos e Granja Campomayor é un exemplo neste sentido”, declarou.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información