A Carqueixa impulsa a comercialización de carne desde o gandeiro ó consumidor

A cooperativa, que agrupa a 200 ganderías dos Ancares, chegou xa a acordos con grupos de consumo de Vigo e da Coruña. O obxectivo do proxecto é lograr un prezo máis xusto para as granxas e posicionarse no mercado cun produto de calidade

Publicidade
A Carqueixa impulsa a comercialización de carne desde o gandeiro ó consumidor

Paisaxe gandeira dos Ancares, caracterizada por un mosaico de pastos, soutos, carballeiras e brezais.

Os becerros dos Ancares, criados ó aire libre nos pastizais da montaña lucense, protagonizan unha iniciativa de comercialización directa da cooperativa A Carqueixa (Cervantes, Lugo), que quere poñer en valor unha carne que considera de categoría ‘premium’. A idea das 200 ganderías que conforman a cooperativa é chegar coa súa carne directamente ó consumidor. O proxecto xa logrou nas últimas semanas acordos con grupos de consumo de Vigo e da Coruña e ábrese agora a toda España a través da web O sabor dos Ancares, que ofrece lotes de carne de 5 e 10 quilos.

A Carqueixa busca con esta iniciativa lograr un beneficio mutuo para as granxas socias e para os consumidores. O obxectivo é conseguir un prezo máis xusto para a carne, que está amparada polo selo Ternera Gallega Suprema, á vez que se lle achega ó consumidor unha carne premium a prezos competitivos.

O proxecto persegue prezos dignos que fagan máis atractiva a gandería, de xeito que se manteña unha montaña viva, poboada e cunha paisaxe tradicional

“É un proxecto co que estamos ilusionados. A xente proba a nosa carne, gústalle e estase animando a facer pedidos” -explica o presidente da cooperativa, José Antonio Díaz.- “Ofrecemos unha carne da máxima calidade, mellor que a das ganderías intensivas, e a un prezo menor ó do supermercado, así que temos boas expectativas, tanto a nivel de Galicia como para zonas como Madrid ou Barcelona”, conclúe.

As 200 granxas que conforman a cooperativa están convencidas da singularidade da carne dos seus becerros, pois practican unha cría tradicional dos animais, que pasan toda a súa vida en libertade nos pastizais de montaña cunha alimentación baseada na lactancia materna ata os 7 meses, co complemento de pastos e forraxes.

ternera gallega

A cooperativa elixe para a comercialización directa os mellores animais das súas granxas, en tanto o resto continúa vendéndose a través da cooperativa de segundo grao Artesáns Gandeiros, da que forma parte. “O proxecto de comercialización directa é unha aposta polo consumidor que queremos que repercuta de forma positiva nas granxas. A idea é que esa carne lle sexa remunerada ás ganderías cun prezo un 20% maior ó do mercado”, explica o xerente da Carqueixa, Román Sánchez.

O reto non é pequeno, pois no transfondo, o proxecto persegue asegurar a continuidade da actividade gandeira nos Ancares, promovendo uns prezos dignos que fagan máis atractiva a profesión. A Carqueixa fai fincapé en que a gandería extensiva contribúe a fixar xente nunha comarca rural moi afectada pola despoboación. Outro impacto positivo do gando é que mantén a actual paisaxe da montaña, caracterizada por un mosaico de pastos, carballeiras, soutos e matos, “sen eucaliptos”, precisan na cooperativa.

Vídeo promocional de ‘O sabor dos Ancares’

Funcionamento do sistema

O sistema de comercialización directa ten un funcionamento sinxelo. Unha vez que o consumidor encarga o seu pedido a través da tenda online, a cooperativa comprométese a facerlle a entrega nun prazo duns 15 días. A Carqueixa fai o procesado dos animais no matadoiro de Taboada (Lugo), desde onde saen os lotes envasados ó baleiro e en transporte refrixerado directamente para o consumidor.

Os lotes compóñense de carne picada, hamburguesas, espaldilla (recomendada para estofar), filetes, chuletas, agulla e xerrete (recomendados para asar), así coma falda, coa que se pode elaborar churrasco. Polo de agora, a distribución estase a facer con transportes frigoríficos contratados, se ben a expectativa é a de implantar unha distribución propia en breve.

A cooperativa ofrece lotes de 5 quilos (53 euros) e de 10 quilos (95 euros), existindo tamén a posibilidade de pedidos de maiores volumes, para os que se ofrecen descontos. Os lotes envasados ó baleiro aguantan 15 días refrixerados, aconsellándose a conxelación da carne que non se consuma de xeito inminente.

De cara a facilitar a preparación das distintas pezas que conforman o lote, A Carqueixa está a iniciar un videoblog coa cociñeira Pilar Rodríguez, que preparará recetas coas distintas pezas. O consumidor tamén ten a súa disposición a canle da Escola de Cociña de Ternera Gallega, que nos últimos meses está facendo unha destacada labor de divulgación culinaria.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información