A policía levanta acta a gandeiros afectados polo lume de Cualedro por pastorear nos terreos queimados

Os afectados denuncian a súa indefensión xa que o pastoreo se realiza en terreos agrarios da súa propiedade, non suxeitos á Lei de Montes e de Incendios. Acusan á Xunta de incumprir as súas promesas e temen que as actas acaben en sancións.

A policía levanta acta a gandeiros afectados polo lume de Cualedro por pastorear nos terreos queimados

Pastos afectados por el incendio de Cualedro recuperados este invierno

Varios gandeiros dos municipios ourensáns de Cualedro e de Baltar, afectados en agosto de 2015 por un devastador incendio que calcinou máis de 3.000 hectáreas, recibiron este mércores pola noite a visita da Policía Autonómica, que os identificou e lles levantou acta por ter o seu gando pacendo nos terreos incendiados.

Os afectados denuncian a súa indefensión, xa que as zonas de pastoreo son terras agrarias de concentración parcelaria que, malia resultar queimadas polo lume, non están suxeitas á Lei de Montes e de Incendios, que obriga a non introducir o rabaño nos dous anos seguintes dende a data do incendio, pero para terreos forestais, como os montes comunais.

O desconcerto entre os gandeiros é maior xa que nunha reunión o pasado mes de decembro co delegado da Consellería do Medio Rural en Ourense, este lles autorizou verbalmente a pastorear nos terreos agrarios da súa propiedade, unha obriga en moitos casos debido á falta de forraxes para os animais.

Ademais, lamentan que non recibiron ningunha axuda das prometidas no seu día polo presidente da Xunta, Alberto Núñez Feijóo, nunha visita ás zonas calzinadas. E é que moitos destes gandeiros non só perderon os pastos nos que mantiñan o seu gando en réxime extensivo, senón tamén rolos de herba e mesmo establos e maquinaria.

En canto aos seguros, os que os tiñan contratados aseguran que cubriron unha pequena parte dos danos e que nalgúns casos aínda non cobraron.

“Tememos que a acta sexa o paso previo á sanción”

José Pérez Bouzas é un dos gandeiros afectados. Vive no Bouzo, no concello de Baltar, e xunto cun irmán levan unha explotación de 35 vacas en extensivo. Ata o verán pasado tiñan tamén un rabaño de máis de 400 ovellas, “pero vendémolas antes do incendio, e foi o que nos salvou pois non teríamos recursos para comprarlles toda a forraxe despois do lume”.

Asegura que axentes da Policía Autonómica “viñeron o mércores pola noitiña e levantaron acta porque as vacas estaban nunha finca nosa de concentración parcelaria que ardera no verán pasado”. “Dixeron que os mandaba o seu xefe da Policía Autonómica para indentificar aos gandeiros que andabamos no queimado”, explica. Algo que non entende porque “a finca é terreo agrícola e non forestal, e a propia Xunta nos prometeu que se non metiamos o gando no monte comunal queimado non teríamos sanción”.

“Non recibín ningunha axuda, nin as grazas por apagar o lume”

No caso de José Pérez Bouzas o lume de Cualedro queimoulle máis de 300 rolos de herba e 70 das 100 hectáreas que ten na PAC. “Puidemos saír adiante porque tiñamos bastante silo de herba e de millo almacenado”, asegura.

En canto ás axudas asegura que “non recibín nin as grazas por apagar o lume e, en canto ao seguro, aínda me están dando largas para cobrar por un comedeiro das vacas e un pastor eléctrico que arderon no incendio, o único que me cubriu”.

Copia da acta levantada pola Policía a un dos gandeiros: 

SANCION_CUALEDRO_02

2 ideas sobre “A policía levanta acta a gandeiros afectados polo lume de Cualedro por pastorear nos terreos queimados

  1. Sócrates

    En setembro, a bombo e platillo, Feijoo e os alcaldes de Cualedro, Baltar e Xinzo de Limia asinaron o “Manifesto de Cualedro”, “acordado para recuperar a superficie queimada no gran incendio rexistrado nese Concello, e que contempla ….o triple compromiso de restaurar, previr o abandono e por en valor os terreos agrícolas e forestais fronte aos incendios…”. Segundo a prensa, Núñez Feijóo dixo que “buscarase unha solución para os gandeiros afectados, que quedaron sen pasto por mor do lume”.
    E agora, Nuñez Feijoo cumpre a súa promesa, e da a solución aos gandeiros afectados: Denúnciaos.
    En que país vivimos? Como podemos seguir aguantando a esta panda de badulaques?

    Contestar
  2. tomas

    hola, parece interesante as explicacions dos afectados, pero apagar o lume non me parece motivo para dar as “gracias” pareceme unha obriga moral de cada un e máis se as propiedades son túas e podes axudar razón de máis

    Contestar

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información