Galego
Data inicio: 11/05/2019
Data fin: 11/05/2019
Lugar: Fundación Ramón González Ferreiro, Paciños
A Escola Galega de Apicultura, integrada pola Asociación Galega de Apicultura, Concello de Allariz e Fundación Ramón González Ferreiro, organiza para o día 11 de maio unha xornada sobre apicultura e fruticultura, que vai dirixida principalmente a promover as explotacións mixtas entre estas dúas actividades moi ligadas entre si.
E é que por un lado hai froitas que dependen directamente da polinización das abellas, mesmo mellorando a calidade e cantidade da froita producida. Por outro, a apicultura tamén se beneficia especialmente de determinadas flores que aportan alimento para as abellas e ofrecen a posibilidade de mellorar a colleita do mel ou diversificar a produción da colmea, como por exemplo co pole.
Na xornada participarán expertos técnicos na produción de castañas e mazás, froitas con moi boa demanda no mercado e cunha floración moi interesante para a actividade apícola. Ademais, explicarase cales son as características destas producións e as posibilidades na súa comercialización. Tamén intervirán apicultores que contarán a súa experiencia na produción de froita e como afecta esta no rendemento das súas explotacións.
Unha das principais ideas será transmitir ós participantes a importancia da diversificación na apicultura e o potencial apícola e frutícola que existe nos montes, en gran parte sen aproveitar. Tamén se fará referencia á variedade e riqueza das especies froiteiras autóctonas de Galicia, que interesa revalorizar e recuperar. A formación completarase cun día de campo que se fará no verán con visitas a explotacións frutícolas e apícolas.
Programa da xornada:
Ás 10.30 h. “Diversificación en apicultura e as explotacións mixtas”. Por Suso Asorey, biólogo e voceiro de AGA
Ás 11 h. “A mazá”. Por Francisco Otero, técnico Xunta de Galicia, e David Asper, apicultor e produtor mazá.
Ás 12 h. Descanso
Ás 12.30 h. “A castaña”. Por Manuel Vilariño, Consello Regulador Castaña de Galicia e José Manuel Guerra, apicultor, produtor de castaña e técnico do Centro Agroforestal Riós.
Ás 13.30 Preguntas e posta en común
Ás 14 h. Xantar
Ás 16 h. “Usos do monte e a apicultura”. Por Diego Sánchez, enxeñeiro forestal do Sindicato Labrego Galego
Ás 16.30 Recuperación variedades autóctonas froiteiras. Por técnico do Sindicato Labrego Galego
Ás 17 h. Preguntas e posta en común
Lugar: Fundación Ramón González Ferreiro, Paciños (Allariz)
Participación: Ata cubrir aforo (máximo 50)
Visita de campo: No mes de xullo organizarase unha xornada de campo
Prezo: 20 € para socios/as de AGA / 40 € para o resto
Máis información e inscricións na web www.apiculturagalega.es, por email info@apiculturagalega.es ou teléfono 981 508 142.
