O selo Revitaliza distinguirá ós restaurantes de Pontevedra que composten os seus residuos orgánicos

A Deputación busca incentivar así a responsabilidade e compromiso ambiental dos establecementos. A iniciativa está apadriñada polo chef estrela Michelín Javier Olleros, de Culler de Pau, que asegura que, grazas á compostaxe, reduciu máis da metade dos residuos que bota ó lixo

O selo Revitaliza distinguirá ós restaurantes de Pontevedra que composten os seus residuos orgánicos

Presentación do selo Revitaliza para restaurantes.

A Deputación de Pontevedra distinguirá co ‘selo Revitaliza’ aos restaurantes da provincia que composten de maneira responsable o seu lixo orgánico. Así o indicou o vicepresidente César Mosquera, quen subliñou que o distintivo pretende ser un recoñecemento aos negocios que teñen un compromiso coa compostaxe e co medio ambiente no seu facer diario.

O vicepresidente subliñou que son moitos os establecementos de hostelería que se incorporaron ao Revitaliza dentro dos concellos que están adheridos, polo que se pensou en facer o distintivo de compostaxe responsable.

“Queríamos que chegara un momento no que puideramos transmitir de maneira seria que hai restaurantes que fan economía circular, que compostan os seus residuos, que teñen produtos abonados naturalmente que ofrecer no restaurante e que están aforrando unha cantidade de emisións de CO2 absolutamente enorme”, explicou, asegurando que os establecementos que compostan reducen as emisións a menos da metade en relación a mandalo a Sogama. “Iso haino que ter en conta nesta semana do Clima e da Emerxencia Climática”, apuntou.

Así, Mosquera anunciou que os restaurantes que teñan un “excelente en compostaxe” poderán lucir nas súas portas os anagramas do Revitaliza, e tamén o distintivo personalizado, tal e como se fai con outras redes de calidade (Michelín, Tripadvisor…).

Cincuenta restaurantes da provincia cumpren xa cos criterios de obtención do selo

En canto a números, indicou que nesta primeira fase, de entre os 120 restaurantes que están a participar no Revitaliza fíxose unha escolma do que hai para valoralos “porque que un restaurante composte un pouco e o resto o leve a Sogama non valería, ten que ter condicións”, dixo. Agora mesmo, pasada a criba, hai 50 que cumplen e terán o distintivo xenérico e o personalizado. Un deles é o restaurante Michelín ‘Culler de Pau’, do chef Javier Olleros, que deu o pistoletazo de saída e apadriña esta iniciativa provincial.

Olleros, padriño Revitaliza
Olleros, responsable de Culler de Pau, afirmou estar encantado de formar parte do Revitaliza. Manifestou que é interesante que dende a administración se potencien iniciativas deste estilo e se dean ferramentas e instrumentos para ordear “as nosas casas” e tomar conciencia do sostible. “Eu xa non uso moito esa palabra porque está baleirada de contido. Creo que a palabra é ser responsables, ter unha actitude individual e cambiar a forma de pensar dende unha cultura diferente. Agora parece que isto está enriba e é o momento de dar un paso adiante e pasar á acción de verdade”.

O chef explicou que desde a instalación de Culler de Pau en Reboredo “pensamos que tiñamos que ter un compromiso co lugar e co contexto”, por iso as súas prácticas e o que queremos facer ían destiñadas a integrarse na paisaxe e ser respectuosos. “Primeiro intentamos cociñar a paisaxe, os recursos naturais que temos preto da casa, que son o gran valor da nosa casa, e logo fixemos unha horta. Despois empezamos a pensar como facer cos residuos, que son un drama nos restaurantes”, afirmou.

“Antes tirabamos tres caldeiros de lixo ó día. Desde que temos o composteiro, tiramos a metade dun” (Javier Olleros)

En canto aos resultados, Olleros salientou que antes de ter o centro de compostaxe do Revitaliza “tirabamos tres caldeiros de lixo ao día. Dende que temos o composteiro, tiramos a metade dun. Calculo que 0 70% do lixo dun restaurante é materia orgánica e nós estamos xa botando no composteiro alomenos o 50%. Isto é marabilloso, porque nos axuda a pensar que primeiro, non é tan difícil, porque esta era unha das dúbidas que tiñamos. Diciamos, madre mía, co ritmo que temos de traballo, como ordenar a cociña? Pero cando nos puxemos a facelo a dificultade non apareceu. É máis sinxelo do que parece”, afirmou.

Destacou que a raíz de comezar a compostar “todos os que traballamos en Culler de Pau (case 20 persoas) comezamos a ver o que desperdiciabamos como un produto máis. Iso é do máis interesante, hai que velo como un produto que vai ao composteiro, do composteiro vai á horta, e da horta vén de novo ao restaurante”.

Tamén sinalou a importancia de desaprender o aprendido, con outras prácticas, e de “ter xente interesante que nos aprenda, como as e os mestres composteiros, que están a facer un gran traballo. Nós cociñabamos na cociña, e darnos ese coñecemento para entender a compostaxe é moi importante esa cadena de información”.

Co seu exemplo por diante, o chef Michelín instou a outros negocios de restauración a seguir o seu camiño: “Nós estamos aprendendo a ordenarnos e non hai que ter complexos. Hai que ir conquistando parcelas de responsabilidade, porque esta terra o merece. Galiza se é algo son recursos naturais e un potencial único no mundo. Ás veces pregúntome que fixo esta terra para que a maltratemos tanto. E isto é unha maneira de ser xenerosos e é imparable”, afirmou.

Asegurou, asimismo, que como empresa o feito de ter un compromiso coa túa actividade e co lugar que che permite a túa actividade sendo respectuoso co ambiente “amplifica o que ofreces como experiencia, aínda que non o cuantifiques nun papel”. “O comensal percíbeo. Aínda non se elixe por ir a un restaurante con este distintivo –o Revitaliza de compostaxe- porque acaba de aparecer ,si hai xa comensais con esta sensibilidade na que este distintivo ou a conciencia que teña o restaurante vai ser un punto maior para ter público. Creo que o comensal cada vez máis pide estas propostas. Hai máis conciencia”, finalizou.

Criterios para obter o distintivo

A técnica do Revitaliza María Abraldes explicou que o que se fai no departamento de compostaxe da Deputación para poder acreditar que os establecementos están a colaborar co proxecto e recibir o distintivo de compostaxe responsable é, primeiramente un compromiso por escrito, un formulario que despois permite ao persoal técnico entrar nas cociñas dos establecementos e cuantificar a cantidade de residuos orgánicos que produce.

Unha vez está cuantificado o biorresiduo, o persoal técnico plantexa a solución para a súa xestión, que pode ser un composteiro individual, un centro modular exclusivo para o establecemento, ou colaborar nun centro de compostaxe público.

Xa adxudicado ese centro ou ese composteiro o Revitaliza dálle unha capacitación ao persoal do negocio de hostalería, formándoo sobre como deben separar os residuos orgánicos, que tipo de residuos deben incluír nesa separación, e como achegalos ao centro de compostaxe. Se esa parte se cumple é xa o persoal técnico, as mestras e mestres composteiras, as que miden semanalmente as cantidades que se achegan para verificar a participación continuada. “É moi sinxelo”, asegurou Abraldes.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información